Hysen Grajçevci Archives - Sofra e Poezise Shqiptare

Deshifrim kodi – Hysen Grajçevci

Admin — Thu, 21 Jan 2021 08:56:40 +0000

Deshifrim kodi

Mbi urë e nën urë,
kalërojnë të larat e të palarat e kohës!
Në memorjen tonë
ca vijëzime shkarpash!
A thua si do t’i emërojmë gjurmët në gravitetin e gdhendur të një amorfe!?
Lum ai që deshifron kodin në testament kurore!

The post Deshifrim kodi – Hysen Grajçevci appeared first on Sofra e Poezise Shqiptare.

Unë i përvuajturi – Hysen Grajçevci

Dërguar nga: Xheva Salihaj — Wed, 20 Jan 2021 22:29:16 +0000

Ne 80 vjetorin e amshimit të Atë Gjergj Fishtes, njeriut, kolosit të letrave që nuk kurseu asgjë për atdheun, letersinë ,shqiperinë.

UNË I PËRVUAJTURI

Të kërkova gjithandej në Fishtë, Gomsiqe, Shkodër,
deri rrëzë Veleçikut!
Isha me atë zanën bjeshkatare!
Atë Gjergj,
Të kujtohet;
është ajo bjeshkatarja,
Zana e Veleçikut
Kur i pate thënë?
“…Krah m’krah bashkë na tue këndue,
Ndertue kem’ ‘i pomendare,
Rr’fe as mot mos m’e dërmue”

E unë i përvuajturi për dheun
dhe gjakun tim vëllazëror,
erdha të marr a të heq mall!?
Këtë nuk e di!
Di se me mall e dhimbje kam lindur !

Erdha Atë,
Të kërkova kudo
e të gjeta në Lahutë,
të gjeta tek “Mrizi i Zanave”,
tek “Anzat e Parnasit”, e… e te “Gomari i Babatasit”!

Të kërkova në
Romë, Paris, Uashington…
Të gjeta në Manastir duke vënë gurin themeltar të alfabetit tonë.

At Gjergj, të falem,
Unë nuk bëra asgjë për Ty!
Përulem para emrit tënd,
ani pse eshtrat ku të pushojnë nuk e di…!?

Poezia që në konkusin e shpallur nga Akademia e Letrave dhe Revista “Mirdita” u vleresua si vargu me i bukur fishtan nga juria, kryetare e së cilës ishte prof. Dr. Rovena Vata.
Faleminderit për vlerësimin Akademia e Letrave…dhe juria!

The post Unë i përvuajturi – Hysen Grajçevci appeared first on Sofra e Poezise Shqiptare.

Biografia ime – Hysen Grajçevci

Dërguar nga: Xheva Salihaj — Sun, 23 Aug 2020 16:14:40 +0000

BIOGRAFIA IME

Emrin ma thonë Alban
Vetë jam Dardan
Baba kam Ilirin
Nënë Arbërinë
Motër Furtunën
Vujtjen Stuhinë
Gjithçka tjetër Atdheun
Dritë Lirinë.

Desha kështu të shkruaj
Një poezi
Dhe ngado që e sjell
Më del BIOGRAFI

( Kam nderin dhe kenaqesine të lexoj Librin me poezi “Shpresë e Përlotur”nga poeti Hysen Grajçevci.)

The post Biografia ime – Hysen Grajçevci appeared first on Sofra e Poezise Shqiptare.

Kronikë në vargje – Hysen Grajçevci

Dërguar nga: Xheva Salihaj — Sun, 05 Apr 2020 18:16:19 +0000

KRONIKË NË VARGJE

Thekur një zë qiellit
gjithandej Evropës
nga “Burg Teatri”
shpërthen e thërret,
hyjnitë zgjon,
yjet prek!
Damarëve ndez e shkrin akuj,
zjarre vë në skenë!

E tha Cvajgu
e pohoi edhe Kafka…
Ai…ringjalli heroin
Te Shkspiri, Sofokliu,
Ibseni, Gëteja,
e pash te Fedja
e gjeta tek Hamleti…

Të rrugëtosh shtigjeve nëpër kohë
me baballarët e tragjedive,
e të përballesh me ta,
Duhet të jesh gjeni
Kështu Krajnc e tha!

Dhe, a nuk e vërtetoi
aktori Beserman,
kur mbi trupin e tij
hodhi unazën e Inflandit
korifeu i teatrit gjerman!?

Moisi, të falem!
Je gjaku i popullit tim,
meteor mbi qiellin e Evropës,
Krenari për Shqipërinë!

The post Kronikë në vargje – Hysen Grajçevci appeared first on Sofra e Poezise Shqiptare.

Rrit me kohën – Hysen Grajçevci

Dërguar nga: Xheva Salihaj — Sun, 05 Apr 2020 18:14:28 +0000

RRIT ME KOHËN

Këtu, kohët janë matur me lashtësinë e kreshtës,
në këta shkëmbinj shpeshherë kemi matur edhe hijen me vdekjen,
vitet me epokat!
Këtu trimat kanë gjetur strehën!

Gurit ia kemi marrë e lënë fjalën
Amanet nga gjyshi këngën
Epika jonë e bukur,
me lahutën jemi rritur
e te lahuta kemi gjetur
motiv fjalën prej burri!
Në ninulla na ka përcjellë
kënga dhe krenaria!?
Jutbina, Muji,
Motra e Gjergjit,
e Gjergj Elez Alia!

Nga Homeri Pellazg
testament “Iliadën”, Trojën,
“Odisenë”, Itakën!
Nga Gjergji ynë
I po atij gjakut Iliro-Pellazg
LAHUTËN…
Marash Ucin,
Të bijtë e Calit,
Çun Mulën
e Oso Kukën.

Heu bjeshkët e mia,
krenaria jonë!

Jo, të vajtoj, s’e kam ndër mend!
Edhe pse loti shpreh mall
e sa për vajin …!
Janë qyqet ato që vajtojnë!
Burrat që për Atdhe bien
rënia e tyre nuk qahet,
aq më pak të vajtohet.
Ata ranë;
Lirinë ta kemi Diell
e në Liri gjakun e tyre ta nderojmë!

The post Rrit me kohën – Hysen Grajçevci appeared first on Sofra e Poezise Shqiptare.