Kam puthur vetëm buzët tua
të zjarrta të ftohta
të kuqe të kafta

e do buzë të tjera janë djegur
vetëm për një puthje të afshët prej cubi

kam puthur vetëm sytë e tu
të qeshur si lumi
e të trembur si sytë e kalit në greminë

e do sy kanë lotuar
tërë natën e lume si shelgu vajtues
për takimin e premtuar me frikë

kam përkëdhelur vetëm flokët tua
të prera shkurtë e herë të gjata ujëvarë
të krehura bukur e të shprishura furtunë

e dikush me gishtërinjtë e dridhur
i ka nxjerrë flokët nga mërzia
për një trokitje të beftë
në derën gjysmë çelë

t´i kam ledhatuar vetëm gjinjtë e tu
të fortë e të çuar peshë
e herë të urtë si qengja të fjetur

e gjinjtë e saj tërë natën janë dridhur
si valët e vlimit
dhe kanë pritur gishtërinjtë e mi
t´ua heqin këmishën e djegur

kështu vetëm ty
të kam dashur e dashur
unë engjëlli yt i nëmur

*Nga libri “Oazë palmash të djegura “

The post Engjëll i nëmur – Sadik Krasniqi appeared first on Sofra e Poezise Shqiptare.

I verbër syri yt i bukur
fytyrë e pështyrë

faqe e nxirë
çjerrje pa zë

në shtizë
flamur i glasitur

hyjneshë
me qyqe në krah

qielli përtoke
balta mbi re

krejt njësoj
për zemrën e plasur

Kosovë, kallnor

The post Krejt njësoj – Sadik Krasniqi appeared first on Sofra e Poezise Shqiptare.

Ti
që aq shumë më flisje
për mjegullat me sy ujku
për netët me prita të zeza

u fanite
në ëndërr

mbi urën që shembej nga dallgët
këmbadorës përpëlitesha të shpëtoj

ti një qen ishe bërë
me mëngët ndër dhëmbë
ike në atë anë

unë
këndej lumit
në një erë të ftoftë
pa këmishë
dridhem

The post Ti – Sadik Krasniqi appeared first on Sofra e Poezise Shqiptare.