Yjet të lodhur nga nata

Fjetën në shtratin e qiellit

Deti si një vajzë e drojtur

Skuqet nga rrezet e diellit.

Përgjumësh palmat nderin degët

Si gërsheta larë me vesë

Jugë e bardhë të puth qerpikët

Vlora ime, mirëmëngjes!

The post Mirmëngjes! – Theodhori Proko appeared first on Sofra e Poezise Shqiptare.

Robert Bërns, o bir skocezi

Sikur të ishe ende gjallë

Do të sfidoja në dolli

Me dinjitet si pijetar.

Veç s’do zgjidhja një uiski

Në tavolinë për dyluftim

Po diçka tjetër më të fortë

Që dhe plakun e bën trim.

Që të ndez si flakë zjarri

Dhe të djeg më keq se prushi

Se jam shqiptar e bir shqiptari

Dhe “luftoj” me raki rrushi…!

The post Poetit pijetar – Theodhori Proko appeared first on Sofra e Poezise Shqiptare.

Kur dëgjoj një këngë labe

Nëpër iso shkrihem, tretem

Ndezur, si qiriu nën flakë

Duke u përvëluar mbetem.

Edhe frymën mbaj i heshtur

Që të thith aromën e saj

Si erë e freskët trëndeline

Kur fryn mëngjeseve në maj.

Atë jehonë dhe gurgullimë

Unë gjithmonë e kam krahasuar

Me Shushicën kur zbret nga malet

Herë e qetë, herë e harbuar.

Kur dëgjoj një këngë labe

Shkrihem, tretem brenda saj

Po për dreq, me zërin tim

As di t’ia marr, as di ta mbaj.

The post Kur dëgjoj një këngë labe – Theodhori Proko appeared first on Sofra e Poezise Shqiptare.

Një mesazh në gjuhë të huaj

U shfaq papritur në ekranin blu

Më shkruante një greke hirebukur

“Ela, glikuli-mu`”.*

Pika vajzës, thashë me vete

Ka dalldisur e s’di se ç’flet

Më quan “glikuli”, mua burrin

Gjashtëdhjetë e kusur vjet.

Sikur të ndodhte në një kohë tjetër

Do t’ia ktheja përgjigjen ndryshe

Gjer në Athinë me këmbë do shkoja

Do ta gjeja ku të ishte.

Dhe atëhere do ta kuptonte

Sa i ëmbël isha vërtetë

Kur të digjej me trup e zemër

Në zjarrin që ndezi vet.

Po ç’ti them tani asaj djallushke

Që më zgjoi ëndërra rinore

“Kliko të lutem mbi një adresë tjetër

Dhe t’u plotësofshin dëshirat dashurore!”

*

-Glikuli-mu`- në greqisht, -Ajde, i ëmbli im!

The post Një mesazh në gjuhë të huaj – Theodhori Proko appeared first on Sofra e Poezise Shqiptare.