Dita e Valbontë – Gëzim Ajgeraj

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

DITA E VALBONTË

Sa gjatë ia ndoqëm
Valbonës rrjedhën grykës

Gurë mbi gurë i ramë
her andej e herë këndej
vrapit gjarpërorë

Bjeshkët na përshëndetën
nga të dy krahët
me petkun e vjeshtës

Ç’bukuri kishte veshur stina
mbi fustanin shumngjyrësh
tek na përshëndeste pa pra

Me ujin blu
ku laheshin zotrat e zanave
freskuam ballin e zjarmishëm të etjes së mallit

Tek fusha e gjësë
ku bjeshka e shtrydhte shpirtin
ia pimë qumështin e kaltërt të zanave

Medet ç’imazhe magjike
kishin zbritur me portretin tim

Dita e Valbontë
hyri nusërore në vargun tim

Tetor, 2020, Valbonë