Gracka e kujtimeve – Landri Xhemalaj
Gracka e kujtimeve
Ngreu e fshij lotët, mere shaminë time
Aty ta kam lënë,te xhepi xhaketës
Në palat e saja,fshehur janë kujtimet
Mos të të vijë turp,se është pak e vjetër
Aty janë të gjitha, mbledhur palë- palë
Të gjitha kujtimet që na solli jeta
Të gjitha në radhë,nga dita e parë
E deri sa gjethet,të na rrëzojë vjeshta
E di ,,,në këtë botë jemi kalimtarë
Si retë në qiell,që sjellin stuhinë
Ashtu kalojmë dhe ne,pa zhurmë, pa fjalë
Dikush vesë e ëmbël,dikush suferinë
Të mos jesh pishman, si erdhëm e ikëm
Si shiu që bie ,nga retë teposhtë
Tokës i dhamë jetë, lulet ,pemët rritëm
S’ishim re pa shi,,me gjëmime boshë
Ndaj mos u përlot,këtu do të jemi
Në rrënjët e baçes,që stolisëm tok
Diellin përmbi degë e lastarë do kemi
Erdhëm dhe do ikim,po nuk erdhëm kot!!
Vlorë 17/09/2021