Ngjashmëri me Ali Pashanë – Ylli Meçe
“Ngjashmëri” …me Ali Pashanë
——
Nuk e di pse ngjajmë bashkë
Nuk e di Ali… – s’e di !
Unë me trup në dhe të huaj
Ti me kokën në Turqi !
—–
Ti me shpatë i re hordhisë
Aq sa drodhe Anadollin
Mua më vranë pashallarët
Ata zemrën time donin .
——
Ti Ali…. je shtrirë si lab
Rrëzë gurëve të kalasë
Unë me shpirtin, marr e jap
Dhimbja ime nuk ka masë.
—–
Nëse vëren… ne ngjajmë pak
Veç.. jo në akte trimërie
Po ta prenë ty kokën prapë
Ngelesh, monument lavdie !
—–
Mua vërtet s’më kanë prerë
Ja… ! Këtu kemi ndryshim
Jam i vrarë në dhe te huaj
Por as i gjallë në vendin tim .
—–
Të betohem Ali Pasha
Nuk e dua kurrë lavdinë !
Kam inat sulltanët tanë
Që kanë vrarë Shqipërinë .
—–
Ahhh.. Pasha i Tepelenës !
Ty askush s’të mundi dot
Unë qaj shpirtin tim, me shpirt
trupi s’ka më gjak…….por lot .
—–
Ja kështu or plaku bardhë
Që ke hedh sharkun mbi supe
O Pashai në dy pjesé
Një këtu… e tjetra tutje !
—–
E shikon si jam dhe unë ?
Ndaj të them se ngjajmë pak
Unë i tërë— në dhe të huaj
Shpirt e zemër i kam larg !
—–
S’ka më keq or Ali Pasha
Dhe i prerë dhe i coptuar
Ti me kokën në Stamboll
Unë me shpirt i pa-bashkuar
——
Ja..që s’qenkam vetëm unë
Të ndarë jemi dhe në tokë
Gjysm’ e shqipes është si ti
Gjysma tjetër krejt pa kokë !