Dëshirë zemre… – Manushaqe Hoxha Laçi

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

Dëshirë zemre…

Botë e sfiduar në mundësi lumturie
të ftoj të ulesh në prehrin tim
Të të bëj kurorë miliona yje
që rrezatojnë nga shpirti im

Botë e heshtur kredhur në mendime
plagëhapur në shekuj vajtuar
Zgjas duart të të dhuroj përqafime
dhuratë jete në jetë munguar

Botë e mbushur dhimbje plot
zemërvrarë lënguar në deje
Të ftoj të ulesh këmbëkryq sot
të heqësh nga supet halle e derte

Botë e munduar mbushur ligësi
bijtë e tu duan të të shpëtojnë
Mundur të keqen me dashamirësi
mirëqenia e lumturia të mbizotërojnë