Shpirt nëpër erë – Rifat Ismaili

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

SHPIRT NËPËR ERË

Miliona këmbë ecin si fijet e barit
Shpirtit të erës në një endje të lirë.
Yjet, mijëra e mijëra duar zgjatin
Dhe ndezin flakë trupin tim
Tek bie në baltë e humb si brilant.
Fantazmat frymojnë në errësirë
U bien degëve të pemëve në mijëra melodi
Qenie balte e sy të enjtur më shtrëngojnë
Drita brenda meje arratiset lart
Duke ndezur fushën e barit…

Vrapojnë poetët e priftërinjtë krahëdjegur
Vajzat e veshura me ar enden nëpër qiej
Mbi kuaj të serte e në krahë engjejsh
E gdhendin dashurinë në qiellin e mermertë.
Dritat e brilantit ua përndjek imazhet
Mbyllur në sarkofagun e një zemre të drojtur
Si kjo imja…