Kur qajnë hardhitë – Xhevdet Bajraj

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

Sugjeruar nga Xheva Salihaj

KUR QAJNË HARDHITË

Udhës së atdheut
u zhdukën gjurmët e tij
sapo u shkri bora
dhe mbinë ferrat nëpër oborret
ku qajnë hardhitë
e shtëpive ku jetojnë pleq të braktisur
të cilëve u digjen buzët dhe goja
u digjet shpirti
nga çorbë e kujtimeve
që vlon përherë
kështu që më kot u fryjnë lugëve

Sa lehtë lindin ëndrrat atje
sa lehtë humbet rruga deri te to
kur qajnë hardhitë qofshin ato edhe të egra

Dikur do ta kuptojnë të gjithë
sa e rëndë është jeta në Kosovë
sa lehtë është të vdiset atje

Dikur
të gjithë do ta kuptojnë
sa gjatë
sa dhimbshëm qan zemra
qajnë hardhitë
para se të thahen

Xhevdet Bajraj
“Kur qajnë hardhitë”, Armagedoni, 2019