Këngë valsi – Seti Pezaku Vladi

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

KËNGË VALSI

E dua valsin si pema gjelbërimin,
Si zogu degën në buzë të një reje,
Çdo tingull, ëndërr e rrahje zemre
Vrapim i gjakut në vena e deje.

Belbëzojnë fjalët e ruajtura nën fletë,
Valë e përvëluar të jep arratinë,
Lehtë-lehtë të ul në kopshte jargavanësh
Ku syri përkëdhelet me dashurinë.

Zjarre trëndafilash ndezin meloditë
Sa dhe perëndimi prej tyre kuqëlon,
Me shkulme gëzimesh shtegton hareja
Sirenat e detit nga gjumi e zgjon.

Do të ngelem pranverë mbytur në cicërima,
Varkë e tingujve valëve në lundrim,
Derën do t’ia mbyll stinës të mos ikë,
Këngë valsi të mbetem, hënë në rrotullim.

@seti pezaku vladi
14/04/2020