Lutje Perëndisë – Seti Pezaku Vladi

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

LUTJE PERËNDISË

Në fillim bote me ne u zemërove,
Litar lotësh zbraze prej qiellit,
Hënën nëpër ujëra copash thërmove,
Akullnajë syrin ia ngrive diellit.

I tregove njeriut se Ti je krijuesi,
Nga lulja e fusha, malin me blerim,
Me ujë e mjegull botën e mbulove,
Paçka se shpirti tu mbush me hidhërim.

Besëlidhen krijove kur syri të pa
Vetëm qiell e det dhe Noen në lundrim,
Dërgove pëllumbin me gjethen e ullirit,
Prap e bëre botën me diell e gjelbërim.

E di o Zot, mëkatarët të kanë mërzitur,
Mbjellin e korrin furtuna çdo ditë,
Besoj në shenjtërinë tënde të ndritur,
Mos na braktis, jepna paqe e dritë!

@seti pezaku vladi
20/04/2020