Një mesazh në gjuhë të huaj – Theodhori Proko

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

NJË MESAZH NË GJUHË TË HUAJ

Një mesazh në gjuhë të huaj

U shfaq papritur në ekranin blu

Më shkruante një greke hirebukur

“Ela, glikuli-mu`”.*

Pika vajzës, thashë me vete

Ka dalldisur e s’di se ç’flet

Më quan “glikuli”, mua burrin

Gjashtëdhjetë e kusur vjet.

Sikur të ndodhte në një kohë tjetër

Do t’ia ktheja përgjigjen ndryshe

Gjer në Athinë me këmbë do shkoja

Do ta gjeja ku të ishte.

Dhe atëhere do ta kuptonte

Sa i ëmbël isha vërtetë

Kur të digjej me trup e zemër

Në zjarrin që ndezi vet.

Po ç’ti them tani asaj djallushke

Që më zgjoi ëndërra rinore

“Kliko të lutem mbi një adresë tjetër

Dhe t’u plotësofshin dëshirat dashurore!”

*

-Glikuli-mu`- në greqisht, -Ajde, i ëmbli im!