Pastel – Seti Pezaku Vladi

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

PASTEL

Hijet mbyllën ngadalë dyert e natës.
Vetëtima thyhet në kurriz të qiellit,
Plasarit porcelanin e vetmisë
Në tehun e heshtjes që flet
Me kthinat e zemrës
Që rri varur në zverk të natës.
Sirena e shiut
Kumboi me padurimin e pritjes
Për të shijuar me majë gjuhe
Grimin e pranverës.
Një bulkth
Më ngjirej refren nëpër zë.
Bashkoj ëndrrën
me cicërimën e bulkthit.
Agu që po vjen
Troket në portën e malit,
Shtriq krahët e valëve mbi det,
Më ndez shporta dëshirash
Trazuar
Me mallin e zërit tënd
Që nis ditën e re.

@seti pezaku vladi
29/04/2020