Prishtina – Berat Luzha

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

PRISHTINA

E strukur
pret fortunën
e ujqit të kanë rënë në vathë
të ta ruajnë kopenë.

Ti ende shpreson
në marrëveshjen mes ujkut e deles!

Kur ujqit e ruajnë kopenë
dihet se çka i gjen kecërit!

E di përrallën e kecërve mitarë
dhe të ujkut këmbëbardhë?!

Prishtinë,
Pse ia hape derën mashtrimit
e ujqit i le të hyjnë në vathë?

Paqe me ujkun nuk ka.
Ujkun duhet vrarë,
në daç ta kesh kopenë,
në daç paqe në vathë!

E ujqit ulërijnë anembanë
e ujqit bëjnë kërdinë në vathë
e ti Prishtinë
ende shpreson në paqe!

E strukur matanë
numëron kecërit e përlarë!

Kur do të ardhësh në log
që kopesë t’i dalësh zot?
Apo do të shkosh në mal
Apo mali te ti do të dal!?

(Drenicë, shtator 1998)
Berat Luzha