Deshire zemre - Manushaqe Hoxha Laçi - Sofra e Poezise Shqiptare

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

Lexuar : 155

Dëshirë zemre

Dua të vij te ju me vargun si himn.
Të lumturoj çdo zemër të pikëlluar.
Buqeta lulesh të mbledh në lëndinë
Aroma jete në shpirt për t’ju dhuruar.

Agimit t’i marr kënaqësinë e rizgjimit.
Bekime pafund të marr për ditën e re.
Vrullin e jetës si lumenj mes vërshimit
Qetësinë e natës kur gjithçka fle.

Nga retë dua të marr shiun e dendur.
Të ketë qielli gjithmonë kaltërsi.
Butësisht të freskoj tokën e etur.
Të gëzojnë të gjithë, nëna, pleq e rini.

T’i marr diellit të çiltrën buzëqeshje.
Lehtësisht të fshij çdo brengë e pikëllim.
Të mbush botën me shpresë jete.
Njeriut t’i largoj çdo dhimbje e mjerim.

Në yje të marr rregullin e qetësinë.
Shpresë të mbjell në zemrat e vrara.
Të ushqej përjetësisht lumturinë.
Lotët të thaj në shpirtërat si parajsa.

Dua të marr në univers pafundësinë.
Të marr bukurinë magjepsëse që ka hëna.
Njerëzimit t’i dhuroj përjetësinë.
Parajsën në tokë si na e ka ënda.

Shpërndaje në rrjetet sociale:

Porosit vide-poezine tende, kontakto => laberianews@gmail.com

Tags: poezi