E ndiej – Gentjan Hasanas

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

E ndiej,

dora ime është plakur.
Rrotullon nëpër gishtërinj
rruazat e ditëve,
në kalendar tespiesh.

Koha, një fill i rrumbullakët
me fjongo kukuvajkash
qëndron,
mbi shkëmbin e pathyeshëm
plot me myshk mërzie.

Do të shiheshim këtë gusht?!
Si gushti i djeshëm,
si gushti i pardjeshëm.

Shpeshtoj ndër gishtërinj ditët
me ngjyra liqenesh të errët;
që të gjitha, shkëlqejnë nga jashtë
prej hënave që ti më fale.

Pastaj,
fiken një nga një si heronj në mur
mbi gozhdën e një “Pse?”-je,
dënuar me varje!
Gentjan Hasanas