Hajdutja e natës – Seti Pezaku Vladi

Dhuroni donacionin tuaj per mirembajtjen e portalit dhe per promovimin e poetit tuaj të preferuar.

Hajdutja e natës

Jam tërësisht e trokitura e natës.
Kurrë s’e kam pyetur natën
se ç’natë është sonte,
ndërsa qielli fle në shtëpinë e vet.
Çdo natë
mbaj natën në gishtërinjtë e mi,
në orët që e pështjellin
shkarkoj në vargje muzën e ngarkuar.
Që nga vlaga e territ të Homerit
kur poezia lindi filiz i blertë,
çdo natë unë vjedh natën.
Jam tërësisht hajdutja e natës.
Të nesërmen,
blej gjumin e humbur
me puthjen e agut.

@seti pezaku vladi
10/11/2021